Seorang peaserta acara Uji Nyali Trans7
Oleh: Ary Suryanto
"Fuh!" gue matiin aje lilinnye. Capek pegangin terus dan ngejaganye biar ga' kene angin.
Biarin deh gelap-gelapan. Tak ape. Gue tetep ga' bakalan takut biar kate nih malem jum'at kliwon kek, dimari ade pocong kek, kuntilanak kek, gendruwo kek, bunyi-bunyian atawe suare nyang tanpe ade wujudnye kek (kentut gue sendiri kali. Hahaha...), atawe penampakan-penampakan lain nyang banyak dipercaye oleh orang-orang keblinger+penakut noh.. , gue pastiin gue bakal lulus di uji nyali ini.
Iya, itu pasti! Dan gue ga' perlu pake bacaan-bacaan dari Al Qur'an segale. Takut dose kalau belepotan dan salah ngebacanye, seperti halnye peserta-peserta sebelumnye noh nyang pade blepotan bace ayat-ayat Qur'annye karena saking takutnye.
Apalagi gue ikutan acare ini sengaje cume pingin ngebongkar kedok acare yang jual ayat-ayat Al Qur'an begini, alah.., tak perlu ikut-ikutan jual ayat juge deh...!
Hadiahnye, nyang berupe duit cash sebesar 3 jute (kurang gede sih, sebenernye), bakal gue pake buat adain acare sunatan masal nyang akan gue hususkan buat cowok-cowok nyang dulu meski udeh pade di sunat tapi beraninye cuma sama cewek doang dan jadi penakut sekali same hantu atawe setan. Siape tahu setelah di sunat dua kali bise jadi cowok nyang bener-bener pemberani. Hahaha... Dasar loe loe pade penakut! Cemen! Huuuh....!
Same penampakan kok takut. Ape pade kaga' tahu kalau sebenernye hantu atawe penampakan apa pun name dan bentuknye itu ulahnye para syaitan juge jin nyang ingkar serta sesat...?! Lagian mereka kan mahluk ciptaan Allah juge nyang kite diwajibkan untuk hanya sekedar mempercayai keberadaannye aje sebagai mahluk ghoib.
Ingat...! Kite ini manusie, mahluk Allah nyang paling sempurne bila dibandingkan mahluk-mahlukNya nyang lain. Malaikat aje kalah sempurna lho sama kite! Apalagi syetan, yach..., tuh mahluk cume mahluk jelek nyang sombong...!
So, salah besar dan keliwat bodoh bila kite sebagai manusie malah takut pada mereka. Apalagi dalam Al Qur'an Allah telah Menjelaskan bahwa syetan adalah nyata-nyata musuh bagi kite. Lha kalau kita malah takut pade musuh, kan pengecut namenye, tuh!
Coba deh kite fikir! Sama Alloh aje terkadang, bahkan acap kali seakan-akan kite nih ga' takut. kenape ame penampakan, syetan dan jin nyang same-same mahluk ciptaanNya kok malah takut... Nyang bener aje!
Lho..., kok?! Lho kok ape..?! Ga' nyadar kalau kite memang acapkali ga' takut pada Allah...?
Sengaje kaga' sholat, kaga' puase, mabuk-mabukkan, judi, zina, ape itu semuanye bukan bukti nyate kalau kite ga' takut pada Allah...?! Iya ga'...?! Hehehe... Peace..!